ຍິນດີຕ້ອນຮັບເຂົ້າສູ່ເວັບໄຊທ໌ ພະແນກສຶກສາທິການ ແລະ ກິລາແຂວງອັດຕະປື; 5ຫຼັກມູນການສຶກສາ: ປັນຍາສຶກສາ, ຄຸນສົມບັດສຶກສາ, ແຮງງານສຶກສາ, ພະລະສຶກສາ ແລະ ສິລະປະສຶກສາ. 3 ລັກສະນະ : ລັກສະນະຊາດ, ລັກສະນະວິທະຍາສາດ ທັນສະໄໝ, ແລະ ລັກສະນະມະຫາຊົນ.

ສກຂ ອັດຕະປື ປະກາດຜົນການສອບເສັງຈົບຊັ້້ນ ມ7 ສົກນີ້ ຢ່າງເປັນທາງການ

st       ໃນຕອນເຊົ້າ ທີ 5 ກໍລະກົດ 2016 ນີ້ ພະແນກສຶກສາທິການ ແລະ ກິລາແຂວງ ອັດຕະປື ໄດ້ຈັດ ພິທີປິດ ການສອບເສັງຈົບຊັ້ນ ມ7 ສົກ 2015-2016 ທົ່ວແຂວງ ຂື້ນຢ່າງເປັນທາງການ ທີ່ສະໂມສອນພະແນກດັ່ງກ່າວ ໂດຍ ພາຍໃຕ້ການເປັນປະທານຂອງ ທ່ານ ຄຳພູນ ແກ້ວມາລາ ວ່າການຫົວໜ້າພະແນກສຶກສາທິການ ແລະ ກິລາແຂວງ ແລະ ການເປັນກຽດເຂົ້າຮ່ວມຂອງ ທ່ານ ແສງທອງ ໜູໄຊຍະຈັກ ຈາກກົມກວດກາ ຜູ້ຕາງໜ້າກະຊວງສຶກສາທິການ ແລະ ກິລາ, ມີ ຫົວໜ້າ ຫລື ຮອງ ຂະແໜງການ ທີ່ກ່ຽວຂ້ອງ ພ້ອມດ້ວຍຜູ້ປົກຄອງ ແລະ ນ້ອງນັກຮຽນ ເຂົ້າຮ່ວມຢ່າງຫລວງ ຫລາຍ.  icon new

m71         ໃນພິທີດັ່ງກ່າວ ທ່ານ ສົມໄຕ ຫີນເພັດສະດາວົງ ຫົວໜ້າຂະແໜງ ມັດທະຍົມສຶກສາ ໄດ້ລາຍງານຜົນສະຫລຸບ ການສອບ ເສັງຈົບຊັ້ນ ມ7 ສົກ 2015-2016ໃຫ້ຮູ້ວ່າ: ໃນສົກນີ້ ທົ່ວແຂວງອັດຕະປື ມີນັກຮຽນຊັ້ນ ມ7 ທັງໜົດ 980 ຄົນ, ຍິງ 407 ຄົນ, ມີນັກສອບເສັງ ທັງໜົດ 980 ຄົນ, ຍິງ 407 ຄົນ, ໄດ້ແບ່ງອອກເປັນ 9 ສູນສອບເສັງ.
ຜ່ານການສອບເສັງຈົບຊັ້ນ ໃນຄັ້ງວັນທີ 21-22 ມິຖຸນາ 2016 ທີ່ຜ່ານມານີ້ ໂດຍປະຕິບັດຕາມຄຳສັ່ງແນະນຳ ຂອງກະຊວງສຶກສາທິການ ແລະ ກິລາ ໃນການດຳເນີນການສອບເສັງ ແລະ ປະຕິບັດຕາມຂໍ້ກຳນົດ ແລະ ກົດລະບຽບການສອບເສັງຈົບຊັ້ນ ມັດທະຍົມສຶກສາ ທີ່ກະຊວງວາງອອກໄດ້ເປັນຢ່າງດີທຸກປະການ, ໃນນັ້ນ ມີຈໍານວນນັກສອບເສັງທີ່ສອບເສັງໄດ້ມີ 978 ຄົນ, ຍິງ407 ຄົນ. ເທົ່າ 99,79 %,ທຽບໃສ່ລະດັບຄາໝາຍທີ່ວາງໄວ້ 95% ໄດ້ລື່ນຄາດໝາຍ 4,79% ຂະນທີ່ມີນັກສອບເສັງຕົກ 2 ຄົນ, ຍິງ 0 ຄົນ. ເທົ່າ 0,21 %.
        ໃນນັ້ນ ນັກສອບເສັງທີ່ເສັງໄດ້ ອັນດັບທີ 1 ໃນທົ່ວແຂວງ ຄື ທ້າວ ຄານໄຊ ກົງໝັ້ນ ໂຮງຮຽນ ມສ ເສດຖາ, ເມືອງໄຊເສດຖາ, ຊຶ່ງເສັງໄດ້ສູງສຸດ 33 ຄະແນນ, ອັນດັບທີ 2 ໄດ້ແກ່ ນາງ ກິນນາລອນ ວັນທານຸວົງ ໂຮງຮຽນ ມສ ຈັນທາ ຊຶ່ງສາມາດເສັງໄດ້ 32 ຄະແນນ ແລະ ອັນດັບທີ 3 ມີຄະແນນສອບເສັງໄດ້ 31 ຄະແນນ ມີ 5 ຄົນຄື: ນາງ ຈັນໄໝ ສີຍາລາດ ໂຮງຮຽນ ມສ ໂພນງາມ; ນາງ ຄານພານິດ ບຸດດາວົງ ໂຮງຮຽນ ມສ ຈັນທາ; ທ້າວ ຫັດຕາວັນ ແກ້ວຈໍາປາ ໂຮງຮຽນ ມສ ຈັນທາ, ທ້າວ ສົມຄິດ ສາຍສຳພັນ ໂຮງຮຽນ ມປ ໂພນໄຊ; ທ້າວ ດາວພະສຸກ ຂຽນມີໄຊ ໂຮງຮຽນ ມປ ໂພນໄຊ.
    ນອກນີ້ ທ່ານ ຍັງໄດ້ລາຍງານໃຫ້ຮູ້ຕື່ມອີກວ່າ: ໃນຈຳຈວນ ນັກສອບເສັງທີ່ເສັງໄດ້ທັງໝົດ ມີຜູ້ທີ່ເສັງໄດ້ຄະແນນ 7ຂື້ນໄປໃນທຸກວິຊາ ມີຈຳນວນ 56 ຄົນ, ຍິງ 21 ຄົນ, ໃນນັ້ນ ສູນສອບເສັງ ມສ ຈັນທາ 27 ຄົນ, ຍິງ 12 ຄົນ, ສູນສອບເສັງ ມສ ຈະເລີນສຸກ 3 ຄົນ, ຍິງ 1 ຄົນ, ສູນສອບເສັງ ມປ ໂພນໄຊ 3 ຄົນ, ຍິງ 1 ຄົນ, ສູນສອບເສັງ ມສ ເສດຖາ 4 ຄົນ, ຍິງ 1 ຄົນ, ສູນສອບເສັງ ມສ ສະໜາມໄຊ 11 ຄົນ, ຍິງ 4 ຄົນ. ,ສູນສອບເສັງ ມສ ນ້ຳປາ 4 ຄົນ, ຍິງ 1 ຄົນ, ສູນສອບເສັງ ມສ ນາງແຮ່ວ 4 ຄົນ, ຍິງ 1 ຄົນ.
    ຕໍ່ຜົນງານດັ່ງກ່າວ ທີ່ນັກສອບເສັງຍາດມາໄດ້ ດ້ວຍຄວາມໂປ່ງໃສຂາວສະອາດ ໃນການສອບເສັງຄັ້ງນີ້ ພະແນກ ສຶກສາທິການແຂວງ ໄດ້ມອບໃບຍ້ອງຍໍ ຂັ້ນພະແນກ ແລະ ເງິນສົດຈຳນວນໜຶ່ງໃຫ້ແກ່ຜູ້ທີ່ເສັງໄດ້ແຕ່ລະປະເພດດັ່ງນີ້.
ປະເພດທີ 1 ໄດ້ຮັບໃບຍ້ອງຍໍ ແລະ ເງິນສົດ 500.000 ກີບ, ປະເພດທີ 2 ໄດ້ຮັບໃບຍ້ອງຍໍ ແລະ ເງິນສົດ 300.000 ກີບ, ປະເພດທີ 3 ໄດ້ຮັບໃບຍ້ອງຍໍ ແລະ ເງິນສົດ 200.000 ກີບ ແລະ ສຳລັບ ມີຜູ້ທີ່ເສັງໄດ້ຄະແນນ 7 ຂື້ນໄປ ໃນທຸກໆວິຊາ ໄດ້ຮັບໃບຍ້ອງຍໍ ຂັ້ນພະແນກ 1 ໃບ, ຊຶ່ງໃນພິທີດັ່ງກ່າວ ໄດ້ມີການມອບ-ຮັບຢ່າງເປັນທາງການ ຕໍ່ໜ້າຜູ້ເຂົ້າ ຮ່ວມ, ຊຶ່ງໃຫ້ກຽດຜັດປ່ຽນກັນຂື້ນມອບໂດຍທ່ານ ປະທານ ແລະ ຄະນະປະທານໃນພິທີຢ່າງສົມກຽດ.
 
ບົດຂ່າວໂດຍ:   ພົມວິຫານ ໄຊຊະນະ
ລົງເວັບໄຊ໌ໂດຍ: ກິຕາ ສິດທິຮັກປັນຍາ